Ростовая икона святой великомученицы Екатерины Александрийской 29 х 40,5 см

Молитвы святой великомученице Екатерине

МОЛИТВА ПЕРВАЯ

О святая Екатерино, дево и мученице, истинная Христова невесто! Молим тя чрез особливую благодать, еюже предвари тя Жених твой, Сладчайший Иисус: якоже посрамивши прелести мучителя, мудростию твоею пятьдесят витий победила еси и, напоивши их Небесным учением, к свету истинныя веры наставила еси, тако испроси и нам оную Божию мудрость, да и мы, расторгнувше вся козни адскаго мучителя и презрев мира и плоти соблазны, достойны явимся Божественныя славы и к разширению святыя нашея православныя веры сосуды достойны соделаемся, и с тобою в Небесной скинии Господа и Владыку нашего Иисуса Христа хвалим и прославляем во вся веки. Аминь.

МОЛИТВА ВТОРАЯ

Моли Бога о мне, святый угодниче Божий (имя), яко аз усердно к тебе прибегаю, скорому помощнику и молитвеннику о душе моей.

Тропарь к Святой Великомученице Екатерине

Тропарь, глас 4:

Добродетельми, яко лучами солнечными, просветила еси неверныя мудрецы. И, якоже пресветлая луна ходящим в нощи, неверия тьму отгнала еси и царицу уверила еси, вкупе же и мучителя обличила еси, Богозванная невесто, блаженная Екатерино, желанием востекла еси в Небесный чертог к прекрасному Жениху, Христу, и от Него царским венцем венчалася еси: Емуже, со Ангелы предстоящи, за ны молися, творящия пречестную память твою.

Кондак, глас 2

Лик честный Божественне, мучениколюбцы, воздвигните ныне, почитающе всемудрую Екатерину, сия бо в тризнищи Христа проповеда и змия попра, риторов разумы укротивши.

Акафист святой великомученице Екатерине

Кондак 1

Избранную и венчанную деву мученицу, невесту Христову Екатерину, похвальными песньми воспоим, яко преславную мучителя победительницу и премудрую философов наставницу: ты же, великомученице Екатерино, имущи дерзновение ко Господу, приклонися милостивне к благопотребным прошениям зовущих ти:

Радуйся, Екатерино, невесто Христова премудрая.

Икос 1

Ангелом равную чистоту имущи, святая дево Екатерино, с Ангелы Божественнаго озарения сподобилася еси, с ними же воспевающи Трисвятую песнь, услыши нас, поющих тебе на земли сия:

Радуйся, честное святыни жилище; радуйся, чудесное знамение сбывшагося на тебе Божия Промысла.

Радуйся, благоволения Отча сосуде; радуйся, страданий Христовых исполнение.

Радуйся, чистое Духа Святаго обиталище; радуйся, светом благочестивыя веры просветившаяся.

Радуйся, святою купелию отрожденная; радуйся, измывшая ризы своя в Крови Агнчей на земли.

Радуйся, ликующая с священными девами на Небеси.

Радуйся, Екатерино, невесто Христова премудрая.

Кондак 2

Видящи Екатерина себе видения сподобльшуюся, тече к святому старцу, икону ей Богоматере прежде того вручившему, и поведа ему, како отвращаше лице Свое ей явивыйся с Пречистою Своею Материю Христос, како безумну, и нищу, и худородну ю нарек, дондеже не оставит идольскаго нечестия. Преподобный же, слышав сия, настави ю в таинствах веры и крести ю. Она же во обновлении духа благодарно пояше Богу: Аллилуиа.

Икос 2

Разум благий, благородство истинное, богатство негиблющее стяжавши в духовном отрождении, святая Екатерина достойна явися Небеснаго Жениха Христа, Иже, паки явився ей, возлюби ю и дарованным перстнем в невесту Себе обручи. Она же, познавши такое к ней благоволение Божие, тако уязвися любовию Его, яко не мудрствоваше более о земных вещах, но о Возлюбленном своем непрестанно мысляше. Таковой благодати сподобльшаяся, слыши от нас:

Радуйся, зловоние мирское возненавидевшая; радуйся, в воню мира Христова текущая.

Радуйся, добрая любительнице Жениха Безсмертнаго; радуйся, сокровище благоволения Вышняго.

Радуйся, деннице пресветлая; радуйся, луно совершенная.

Радуйся, маслино, в дому Божии насажденная; радуйся, кедре, в Ливане высокорасленный.

Радуйся, Екатерино, невесто Христова премудрая.

Кондак 3

Сила Вышняго даде тогда святей Екатерине дерзновение, еже нечествующаго царя Максимина о принесении идолом жертв обличити небоязненно, и той пребысть безгласен на мног час, не могий противитися ея глаголом. Она же, благодарящи Бога, воспеваше: Аллилуиа.

Икос 3

Имущи святая Екатерина свыше данную ей премудрость, егда нечестивый царь, поставив пред собою, вопрошаше ю о роде ея и сане, она исповеда себе быти дщерь царскую, философския и риторския науки добре изучившую, паче же Христову невесту себе наименова, в явное отвержение идольскаго служения. Сего ради воспеваем ей сице:

Радуйся убо, Екатерино преславная; радуйся, царское священие.

Радуйся, пчело, дыма идольскаго отлетевшая, радуйся, голубице, златы крила имущая.

Радуйся, кадило Христова благоухания.

Радуйся, Екатерино, невесто Христова премудрая.

Кондак 4

Бурею ярости вознеистовився царь на святую деву, рече к ней: «Не глаголи зле о бозех наших». Святая же Екатерина отвеща: «Аще восхощеши отрясти мрак прелести от душевных ти очей, уразумееши богов твоих худость и познаеши истиннаго Бога, Егоже имя, токмо глаголемое, или крест, изобразуемый на воздусе, прогоняет боги твоя и погубляет. И аще повелиши, явлю тебе истину, поющи Богу моему: Аллилуиа».

Икос 4

Слышав нечестивый царь свободный и мудрый ответ твой о вере Христовой, убоявся, да не будет побежден от тебе, собра от пределов державы своея мудрецов, числом пятьдесят, на прение. Ты же, Архангелом Михаилом утвержденная и о победе уверенная, возрадовалася еси вступити в прение с ними. Приими убо, дево, от нас похвалу сию:

Радуйся, изъявительнице ума Христова; радуйся, херувимское стяжавшая Богопознание.

Радуйся, серафимскою воспаленная к Богу любовию; радуйся, мудрых мудрейшая.

Радуйся, духовный меч на неверие изострившая; радуйся, нечестия прогонительнице.

Радуйся, верных наставнице.

Радуйся, Екатерино, невесто Христова премудрая.

Кондак 5

Боготечной звезде была еси подобна, Екатерино, препревши пятьдесят витий и наставивши их на путь христианский, ведущий к праведному Солнцу, от Девы возсиявшему Христу Богу, своими мудрыми глаголы, иже и осуждени бывше за Христа на сожжение и напутствовани молитвою твоею, с радостию идоша в огнь, поюще: Аллилуиа.

Икос 5

Видев царюющий повеления своя в тебе пренебреженны и увещания презренны, обратися к лукавству, еже ласканием прельстити тя, обещая полцарства тебе дати. Ты же веру сокровищам земным предпочетши и Жениха Христа возлюбивши паче земнаго царства и одежду мученичества паче багряницы, отвергла еси его суесловие. Сего ради восписуем ти сия похвальная:

Радуйся, дево, лесть обличившая; радуйся, запинателя змия поправшая.

Радуйся, дщерь царева; радуйся, дево, рясны златыми одеянная.

Радуйся, всякое вещество превозшедшая; радуйся, на гору боговидения востекшая.

Радуйся, светом богопознания просвещенная; радуйся, труба духа, воспевшая глас истиннаго богословия.

Радуйся, доброе веры исповедание; радуйся, света евангельскаго сияние.

Радуйся, законов вечных хранительнице; радуйся, наша помощнице.

Радуйся, Екатерино, невесто Христова премудрая.

Кондак 6

Проповедником богоносным, апостолом поревновавши, дерзновенно пред лицем мучителя проповедала еси Христа, истиннаго Бога, Емуже в ранах и в темнице пела еси: Аллилуиа.

Икос 6

Возсиявый в сердце твоем свет истиннаго богоразумия отгнал есть мрак скорбей, иже не остави тя алкати, голубицею пищу ти посылая, ниже стужати о болезни, посетил бо Сам тя в темнице, ободряя и многи венцы обещавая. Ты же, терпеливодушная, сим паче укрепилася еси и царицу Августу и воеводу Порфириа, с воины притекших к тебе, обратила еси к свету веры Христовой и научила пети тебе сия:

Радуйся, мироположнице Божественныя любве; радуйся, адаманте крепкий.

Радуйся, вино чудес неизреченных; радуйся, врага терпением убившая.

Радуйся, язвы Господа на теле своем носившая; радуйся, царице Августе с пришедшими к мученическому подвигу путенаставнице.

Радуйся, яко во тьме свет была еси; радуйся, яко Сам Господь, Свет мира, тебе, в темнице бывшей, Себе явил есть.

Радуйся, уз греховных скорая решительнице; радуйся, болезнующих скорая целебнице.

Радуйся, помощнице нашего спасения.

Радуйся, Екатерино, невесто Христова премудрая.

Кондак 7

Хотящу безбожному царю привести тя к мерзкому идолослужению, паки сети подстилает тебе, премудрая, еже уловити тя лестно похвалою красоты твоея; ты же красоту вещь привременну и скоропреходну именовала еси, Христа же исповедала еси Бога жива и истинна и пела Ему: Аллилуиа.

Икос 7

Новую показа царь ярость и безчеловечие, повелев епарху колесами растерзати девственное, чистое и святое тело твое, но чудесно рукою Ангела абие разрешена была еси безвредна и колеса на части сокрушены, имиже многи от неверных убиены, яко удивися сам царь и предстоящий народ, иже и взываше: «Велик Бог христианский». Мы же, чудящеся сему, взываем тебе:

Радуйся, мученице, Ангелом честная и говейная; радуйся, славо полков страдальческих.

Радуйся, светлая на враги победа; радуйся, страх неверных.

Радуйся, сосуде множайшия силы Божия; радуйся, радование верных.

Радуйся, Екатерино, невесто Христова премудрая.

Кондак 8

Странное славы изменение и за Христа страдание царицы и воеводы с воины видевше, устранимся любве мира и плоти и вперим себе к разумению Бога, Сей бо есть красота, и слава, и венец нам, поющим: Аллилуиа.

Икос 8

Весь сладость, весь желание тебе, святая Екатерино, бысть Иисус: сладце бо Его ради горкия муки терпела еси и скипетр, предлагаемый тебе, попрала еси, предзрящи будущее воздаяние. От нас же приими похвальная сия:

Радуйся, чистая, чисте Чистаго возлюбившая; радуйся, горлице, Краснаго Жениха в пустыне дольнаго мира вожделевшая.

Радуйся, воню риз Его благоухавшая; радуйся, яко серна на горах ароматских искавшая Рожденнаго прежде холмов вечных.

Радуйся, подвиг страдальческий ради любве Христовы совершившая; радуйся, лик мученический Богу приведшая.

Радуйся, яко витии тобою получиша Царство Небесное; радуйся, яко тоеже тобою получити чаем.

Радуйся, покрове и забрало наше.

Радуйся, Екатерино, невесто Христова премудрая.

Кондак 9

Все естество ангельское возрадовася радостию, зря тя, Екатерино, победивши миродержца, шествующую к премирным яко победоносную воеводу, в последовании полка страдальческаго, и воспе победная, взывая: Аллилуиа.

Икос 9

Витии многовещаннии заустишася: не возмогше бо противовещати богодухновенным словесем твоим, молчанием почитают дарования твоя; мы же, немощнии, како можем отверсти уста на хвалы твоя? Однако дерзаем и молим, сподоби, благая, безбедно принести тебе песнь сию:

Радуйся, органе Духа Святаго; радуйся, заре неизреченнаго осияния.

Радуйся, догматов Божественных пучино; радуйся, хитросте, препревшая философов.

Радуйся, чаше премудрости; радуйся, плетения витий растерзавшая.

Радуйся, пленицы греховныя разрешающая.

Радуйся, Екатерино, невесто Христова премудрая.

Кондак 10

Спасти хотящи душу твою, о теле твоем нерадила еси, Екатерино, и на мечное усечение, мучителю давшу на то изречение, ты радостно потекла еси, поющи Святому Безсмертному: Аллилуиа.

Икос 10

Стена тверда и непреодолима явилася еси женам, тебе на место усечения провождающим и с рыданием тя жестокосерду к себе и безразсудну быти именующим: яко не пощадила еси сладкаго живота в цвете юности, яко презрела еси земное предлагаемое царство и блаженство. Ты же воспретила еси неполезный плач их и суесловие, текущи скорейше соединитися чрез смерть со своим Возлюбленным, того ради слышиши:

Радуйся, радостно за Главу Церкве Христа под меч главу свою приклонившая; радуйся, до конца претерпевшая.

Радуйся, течение добре скончавшая; радуйся, яко ни скорбию, ни ранами, ни мечем с пути Христова исповедания не совратилася еси.

Радуйся, яко пламень любве в источнице крове неугасимь соблюдшая; радуйся, мучеников красото.

Радуйся, крепкое христиан прибежище.

Радуйся, Екатерино, невесто Христова премудрая.

Кондак 11

Пение похвальное дерзнухом принести тебе, но оскудевает слово наше и недоумевает ум, како глаголати; обаче слово твое премудрое, многих исхитившее от невежества и идолонечестия, возставляет нас. Даждь нам слово твое, во еже пети удивльшему на тебе величия Своя Богу: Аллилуиа.

Икос 11

Светоприемную тя свещу, мечным усечением погашенную, но на свещнице Небеснем пред Престолом Святыя Троицы поставленную, видевше Святии Ангели, поклонишася Живущему во веки и, получивше от Владыки повеление, девственное тело твое на горе Синайстей погребоша, да не видимо будет, якоже сама хотела еси, врагом Господним. Мы же песнь сию возсылаем ти:

Радуйся, солнцеобразная дево, на Небеса духом возшедшая; радуйся, Сиона Горняго достигшая.

Радуйся, венче доброты в руце Господни; радуйся, чаше, от обилия дому Божия черплющая радость.

Радуйся, к скинии нерукотворенней, вечней приближившаяся; радуйся, на горе законней почивающая телом.

Радуйся, яко тамо видена быша шествия Бога Синаина, Бога Иаковля; радуйся, места боговидения Моисеева одержание.

Радуйся, ревности Илиины указание; радуйся, купины несгораемой явление.

Радуйся, дево, Деве Царице, в ризы позлащенны одеянной, преиспещренной вследствующая; радуйся, яко тобою Сый воспевается посреде дев тимпанниц.

Радуйся, яко на тебе велелепота Его; радуйся. Престола Вечнаго предстоятельнице.

Радуйся, от храма вселенныя молитвенники к тебе назирающая; радуйся, кадило молитв Вышнему о нас благоприятное.

Радуйся, Екатерино, невесто Христова премудрая.

Кондак 12

Благодать дана тебе от Бога руководствовати к познанию истины Его, в тайне сокровенней, и даяти всем яже к пользе прошения. Темже мы, помраченнии, умиленно просим тя, мудрая дево: просвети умныя наши очи и положи нам к Небеси стезю проходну, да поем с тобою ныне и во вся веки Единому Премудрому: Аллилуиа.

Икос 12

Поюще крепкия твоя мученическия подвиги, хвалим тя, яко одушевленный сосуд спасения человеков: твоим бо разумом Бог премудрость премудрых века сего погуби; тобою витий призва в язык свят, в люди обновления, яко тем страдати за Христа. Просвети и нас, благая дево, помраченных, да зовем ти:

Радуйся, зерцало Божия мудрости; радуйся, силою Вышняго одеянная.

Радуйся, подвижнице, елеем радования умащенная; радуйся, воеводо, полк Божий к вечному величеству предпославшая.

Радуйся, во светлости святыя вшедшая; радуйся, во свете неприступнем Живущему в лице пламенных слуг представшая.

Радуйся, гром трисвятаго пения гласом своим умножающая; радуйся, неизреченную сладость доброты вкушающая.

Радуйся, яко хвала и радование над главою твоею; радуйся, яко вечная слава тебе объемлет.

Радуйся, от Триипостаснаго Божества венцем Небеснаго Царствия увенчанная; радуйся, благодати и безконечной славы нам ходатаице.

Радуйся, Екатерино, невесто Христова премудрая.

Кондак 13

О святая великомученице Екатерино! Приими сие похвальное пение и избави нас от враг видимых и невидимых и от вечнаго мучения твоим благоприятным ходатайством сохрани, да с тобою присно поем Богу: Аллилуиа.

Житие святой великомученицы Екатерины Александрийской

Екатерина (до принятия христианства – Доротея) Александрийская родилась в 287 году (в других источниках называется 294 год). Существует несколько жизнеописаний святой, самыми известными из которых являются жития Симеона Метафраста и Анастасия. Её отцом был богатый и очень влиятельный в Александрии человек. Девушка получила прекрасное образование, она знала несколько языков и имела глубокие познания в самых разных областях науки, литературы и искусства. Кроме того, она была очень красива. Родители стремились устроить её жизнь и хотели найти достойного жениха. Но она говорила, что выйдет замуж только за того человека, который превзойдёт её во всём.

Однажды девушке приснилась Богоматерь с Младенцем. Мария заговорила с Доротеей, но Иисус отворачивался от неё. Великомученица задумалась о смысле этого сновидения и пришла в христианскую церковь Через некоторое время один монах из Сирии крестил её и дал христианское имя. После принятия христианства, сновидение повторилось. Но теперь Младенец не отворачивался от Екатерины, а напротив, улыбался ей и вручил девушке свой перстень.

Екатерина обладала даром красноречия и обратила в христианство много людей. Во время языческого богослужения святая Екатерина пришла в храм и хотела убедить одного из тетрархов (скорее всего, это был Максимин) принять Веру Христову. Цезарь был покорён красотой и умом девушки, но свои убеждения менять не собирался. Он позвал придворных мудрецов, чтобы они смогли доказать его правоту. Но в диспуте победила Екатерина и разгневанный Максимин приказал сжечь философов на костре.

Убедившись в том, что восемнадцатилетняя девушка превосходит мудростью старцев, Максимин решил заставить её отказаться от Христа с помощью угроз. Но великомученица была непоколебима. Тогда цезарь подверг Екатерину пыткам и посадил в темницу. Один из военачальников, Порфирий, пришёл туда вместе с женой императора, чтобы ещё раз попробовать переубедить девушку. Но в результате получилось наоборот – Екатерина обратила их в христианство. Максимин приказал казнить и свою жену, и своего друга.

Затем настала очередь Екатерины. Придворные соорудили специальные колёса с шипами, чтобы смерть святой была мучительной. Но Господь разрушил эту машину. Тогда палач отрубил Екатерине голову. По свидетельству очевидцев, из раны вместо крови текло молоко. После казни тело Екатерины исчезло. Божии ангелы отнесли его на высочайшую гору Синая. Именно там через три столетия были обретены мощи святой Екатерины Александрийской. Их перенесли в храм, при котором был основан монастырь. Святые мощи Екатерины Александрийской до сих пор находятся в монастыре святой Екатерины и привлекают множество паломников. Кроме того, частицы мощей хранятся в России (Екатерининский собор под Петербургом) и в Германии. Католики отмечают день памяти Екатерины Александрийской 25 ноября, а православные – 7 декабря. Святая почитается как покровительница города Екатеринбурга и Слудерно (коммуна в Италии).

Мощи Святой Екатерины находятся в Монастыре Святой Екатерины в синайской пустыне (Египет).

При своей жизни святая Екатерина участвовала в диспуте с пятьюдесятью великими учеными своего времени, но никто из них не смог соперничать с ней в уме и мудрости. Более того, все ученые мужи после бесед со святой Екатериной уверовали в Христа. Поэтому святая Екатерина считается покровителем людей, стремящихся к знаниям и истине (студенты, ученые) или работающих в образовательной сфере (учителя).

По молитвам святой Екатерине девушки удачно выходят замуж и рожают здоровых детей.

Перед иконой Святой Великомученицы Екатерины Александрийской молятся женщины с именем Екатерина о заступничестве их Святой покровительницы перед Господом.

Икону можно подарить:

- студентам, ученым, учителям;

- девушкам, которые хотят счастливо выйти замуж;

- женщинам, которые просят Господа о даровании им ребенка,

- беременным женщинам, которые хотят выносить и родить здорового ребенка;

- девочкам, девушкам и женщинам, носящим имя Екатерина.