Ростовая икона святого Антония Печерского 29 х 40,5 см

Молитвы преподобному Антонию Печерскому

МОЛИТВА ПЕРВАЯ ПРЕПОДОБНОМУ АНТОНИЮ КИЕВО-ПЕЧЕРСКОМУ

О добрый наш пастырю наставниче, приснопоминаемый иноков российских первоначальниче, преподобне и богоносне отче наш Антоние! Ты горе на небеси пребываеши, мы низу на земли, удалени суще от тебе не толико местом, колико греховною нечистотою нашею; обаче памятующе отеческую любовь твою к людем, ти сродным, припадаем и молимтися с умилением и верою: помози нам, грешным, покаянием очиститися и достойным быти помилования и прощения от Господа и Создателя нашего. Умоли Его благость даровати нам великия и богатыя милости: земли плодоносие, воздуха благорастворение, мир глубок, братолюбие искреннее, благочестие нелицемерное, житейских потреб довольство, и да не во зло обратим благая, даруемая нам от щедротодательныя Его десницы, но во славу имене Его святаго и во спасение наше. Соблюди, чудотворче святый, благомощными твоими молитвами российския грады, обитель твою и всю страну православно­российскую невредимы от всякаго зла, и вся люди, жительствующия в обители твоей и на поклонение в ню приходящия, осени небесным твоим благословением, и в скорбех, бедах и болезнех утешение, избавление и исцеление им подаждь, да благодарно славим, хвалим и величаем прославльшаго тя Господа, чрез тебе дивно благоде­тельствующаго нам, Безначального Отца, Единороднаго Его Сына и Единосущнаго Его Духа, Троицу Живоначальную и Нераздельную, и твое святое заступление во веки веков. Аминь.

МОЛИТВА ВТОРАЯ

Моли Бога о мне, святый угодниче Божий (имя), яко аз усердно к тебе прибегаю, скорому помощнику и молитвеннику о душе моей.

Тропарь преподобного Антония

глас 4

От мирскаго мятежа изшед,/ отвержением же мира евангельски Христу последовал еси/ и, равноангельное житие пожив,/ в тихое пристанище Святыя Горы Афона достигл еси,/ отонудуже благословением отцев в гору Киева пришед/ и тамо трудолюбно жизнь совершив,/ Отечество твое просветил еси/ и, множеству монашествующих стезю, ведущую к Небесному Царствию, показав,/ Христу сия привел еси,/ Егоже моли, Антоние преподобне,// да спасет души наша.

Кондак преподобного Антония

глас 8

Возложив себе Богу, паче всех возлюбленному от юности, преподобне,/ Тому от всея души любовию последовал еси,/ мира же тленная ни во чтоже вменив, в земли пещеру соделал еси/ и, в ней добре противу невидимаго врага козней подвизався,/ яко светозарное солнце, во вся концы земли возсиял еси,/ отонудуже, веселяся, прешел еси к Небесным чертогом./ И ныне со Ангелы Владычню престолу предстоя,/ поминай нас, чтущих память твою, да зовем ти:// радуйся, Антоние, отче наш.

Акафист преподобному Антонию Печерскому

Кондак 1

Избранный угодниче Христов, иноков русских первоначальниче и великий чудотворче, преподобне отче наш Антоние, с любовию приносим ти сия хвалебныя песни, яко небесному предстателю нашему; ты же, имеяй дерзновение ко Господу, молися о спасении нас, грешных, да зовем ти благодарно:

Радуйся, Антоние, монашескаго на Руси жития первоначальниче.

Икос 1

Ангел во плоти был еси, преподобне отче Антоние, аще и на земли родился еси во граде Любечи, но вышний град, Иерусалим прекрасный, гражданина тя стяжа: обитаеши бо в нем со Ангелы и святыми и чудес лучами озаряеши выну Отечествие твое земное, от нас же, чтущих тя, услыши похвальное пение сицевое:

Радуйся, родителей благочестивых сыне; радуйся, града Любеча святое прозябение.

Радуйся, рая Иисусова ветве многоплодная; радуйся, делы благими Христу благоугодивый.

Радуйся, от младенчества Богом избранный; радуйся, от юности Бога всею душею возлюбивый.

Радуйся, вся заповеди Господни верно сохранивый; радуйся, во оправданиях Владычних непорочно ходивый.

Радуйся, чистое вместилище добродетелей; радуйся, красное селение Духа Святаго.

Радуйся, целомудрия рачителю; радуйся, смирения любителю.

Радуйся, Антоние, монашескаго на Руси жития первоначальниче.

Кондак 2

Видев Господь душу твою, отче Антоние, пламенем Божественныя любве объятую, в юношеском возрасте научи тя богоугождению истинному, Егоже промыслом наставляем, пещеру в Любечи ископал еси и в ней в молитвах усердных пребывал еси, подвизался сокрушити главу адскаго змия и победити вся его искушения, да возможеши достойно и праведно воспевати Триединому Богу ангельскую песнь: Аллилуиа.

Икос 2

Разум небесный свыше тебе даровася, преподобне отче Антоние, и в юных летех мудростию старческою процвел еси, вся тленная в уметы вменив, единому же Богу благоугождати вожделев, чесому свидетель неложен пещера, в юности тобою ископанная в Любечи для подвигов духовных, яже яко труба всем возвещает, каков подвижник был еси в юности твоей. О сем дивящеся, вопием ти:

Радуйся, юноше, Богом возлюбленный; радуйся, отроче десницею Всевышняго освященный.

Радуйся, пророка Божия Илии, в пещере жившаго, благий подражателю; радуйся, Крестителя Христова Иоанна, в пустыни обитавшаго, ревностный последователю.

Радуйся, пещерное подвижническое житие усердно возлюбивый; радуйся, многая благодатная дарования стяжавый.

Радуйся, закон Бога твоего на скрижалех сердца твоего написавый; радуйся, заповеди Евангелия Христова свет стезям твоим имевый.

Радуйся, Христа премного возлюбивый; радуйся, непорочно и свято на земли поживый.

Радуйся, мир и вся красная его презревый; радуйся, о горних благах выну помышлявый.

Радуйся, Антоние, монашескаго на Руси жития первоначальниче.

Кондак 3

Силою Божиею укрепляемый, Отечествие твое земное оставил еси, Антоние богомудре, и в жребий Богоматере, Святую Афонскую гору, удалился еси, да тамо обрящеши пристанище тихое ко спасению и навыкнеши иноческому равноангельному житию, егоже возжелел еси, да сподобишися благоприятно славословити Творца всяческих Бога и пети Ему: Аллилуиа.

Икос 3

Имея помысл чист и душу непорочну, отче Антоние, яко овча кроткое, на пажить Богоматернюю, Святую Афонскую гору, притекл еси и к доброму пастырю иноческия обители обратился еси, прося его, да причтет тя к стаду словесных своих овец; тот же, провидев в тебе сосуд избран Духу Святому, с любовию тя прия и во иноческий чин облече. Мы же ублажаем тя звании сими:

Радуйся, иноче боголюбезный; радуйся, постниче нелицемерный.

Радуйся, воине духовный, не обязавыйся куплями житейскими; радуйся, куплю небесную совершивый.

Радуйся, Христа, бисера драгаго, обретый; радуйся, Того ради Отечествие земное оставивый.

Радуйся, Того ради странник и пришлец на земли чуждей бывый; радуйся, любовию крепкою с Ним навеки соединивыйся.

Радуйся, Афонския горы жителю добрый; радуйся, жребия Богоматерняго прозябение благодатное.

Радуйся, преподобных отец Афонских духовный учениче; радуйся, богоносных пустынножителей Святыя горы неленостный сподвижниче.

Радуйся, Антоние, монашескаго на Руси жития первоначальниче.

Кондак 4

Бури страстей избежав, в пустыни Афонстей безстрастия благодатнаго достигл еси, преподобне отче Антоние, и духовно возрасл еси в мужа совершенна о Христе; темже безмолвия крайняго возжелев, с благословения игумена твоего, в горе, в пещере вселился еси и тамо в молитве и посте безмолвно подвизался еси, вопия немолчно Богу: Аллилуиа.

Икос 4

Слышав игумен твой глас небесный, повелевающ ему, да послет тя, отче Антоние, в страну Русскую на подвиги духовныя, призва тя и благослови, да идеши туде, идеже рожден был еси, и устроиши обитель иноческую на месте, свыше Богом на то предызбраннем. Сего ради тебе зовем:

Радуйся, светильниче Божия благодати, на Афоне возжженный и Россию духовно просветивый; радуйся, яко свет добрых дел твоих немерцаемо светится присно.

Радуйся, заре невечерняя Солнца Правды Христа; радуйся, послушания рачителю, безпрекословно волю игумена твоего исполнивый.

Радуйся, святое благословение горы Афонския в наследие стране Русской принесый; радуйся, в волю Божию всего себе предавый.

Радуйся, мудрый странниче, иский Отечествия горняго; радуйся, краснеи нозе твои в путь, спасительный для многих, направивый.

Радуйся, вся дольняя презревый, о горних же выну воздыхавый; радуйся, нищету духовную себе совершенно усвоивый.

Радуйся, смирения святаго преисполненный; радуйся, слезами молитвенными себе орошавый.

Радуйся, Антоние, монашескаго на Руси жития первоначальниче.

Кондак 5

Боготечней звезде подобен быв, отче Антоние, от Афона на Русь притекл еси, и во граде Киеве, в пещере варяжстей, вселился еси, обиталище разбойников в храм молитвы претворив, идеже день и нощь в молитве неусыпно подвизался еси и благоумиленно воспевал еси Господу: Аллилуиа.

Икос 5

Видевше тя людие киевстии, Антоние богоносне, яко Ангела Божия, всеми добродетельми украшена и равноангельное житие в пещере провождавша, прихождаху к тебе усердно, ови благословения и молитв от тебе ищуще, ови же подвизатися с тобою хотяще; ты же, по глаголу Христову, приходивших к тебе не отгонял еси, но спасению человеков радостно служил еси, и основание славней лавре Печерстей положил еси, яже красуется тобою, яко краеугольным камнем своим, и воспевает ти песни таковыя:

Радуйся, подвижничество духовное в Русской стране насадивый; радуйся, слез твоих теченьми оное во сто крат уплодоносивый.

Радуйся, делателю добрый винограда небеснаго; радуйся, водительству твоему себе вдавших управителю.

Радуйся, в подземных кровех пространство царствия небеснаго получивый; радуйся, к нему бодренно и неуклонно ученики твоя путеводивый.

Радуйся, правило веры истинныя; радуйся, образе кротости духовныя.

Радуйся, верховный отче иноков русских; радуйся, зерцало светлое всех добродетелей иноческих.

Радуйся, о немже радуются Ангелы на небеси; радуйся, о немже Бога славят человецы на земли.

Радуйся, Антоние, монашескаго на Руси жития первоначальниче.

Кондак 6

Проповедник смирения святаго был еси братии твоей пещерней, преподобне отче Антоние; смирения бо ради игуменства и священства уклонился еси, любя паче поучати братию не толико властию и словом, колико примером святоподвижнаго жития твоего, по глаголу Господню, всем быв слугою. Темже ныне прославляешися со Ангелы и сладце поеши Пресвятей Троице: Аллилуиа.

Икос 6

Возсиял еси на горах Киевских яко столп утверждения верных, Антоние богомудре, и яко денница светлая, от мрака пещернаго востекл еси на гору небесную, отонудуже озаряеши Церковь православнорусскую, в нейже почитаешися по достоянию первоначальником иноческаго жития и слышиши от верных чад ея пение сицевое:

Радуйся, прославльший горы Печерския добродетельми твоими духовными; радуйся, претворивый пещерное жилище разбойников в храмы Господа славы.

Радуйся, в подземных кровех главу глубиннаго змия крепко сокрушивый; радуйся, богомыслием непрестанным еще во плоти небесная блага созерцавый.

Радуйся, утешения Божественнаго сподобивыйся; радуйся, умиления молитвеннаго преисполненный.

Радуйся, многих чад о Христе стяжавый; радуйся, подражатели жития твоего святаго отечески возлюбивый.

Радуйся, яко семя твое духовное не оскуде в земли Русской; радуйся, яко веселишися со чады твоими во обителех райских.

Радуйся, яко плод благокрасный, предивнаго Феодосия, духовно возрастил еси; радуйся, яко с ним вкупе во славе небесней пребывая, Бога выну о нас, грешных, умоляеши.

Радуйся, Антоние, монашескаго на Руси жития первоначальниче.

Кондак 7

Враг спасения человеческаго хотя скорбь тебе сотворити, преподобне отче наш Антоние, вооружи гневом на тя великаго князя Киевскаго Изяслава; ты же, гневу его место уступая, в область Черниговскую удалился еси и, в горе Болдиней пещеру себе ископав, тамо люботрудно подвизался еси, и тем начало обители Свято-Ильинския положил еси, яже благоговейно чествует ныне твою пещеру, чудесы многими прославленную, о нихже вернии прославляют дивнаго во святых Своих Бога, зовуще: Аллилуиа.

Икос 7

Новаго тя Антония Великаго дарова Господь стране Русской, преподобне отче; якоже бо той древле всю Церковь вселенскую светом добродетелей и чудес своих просвети и первоначальник всех иноков явися, тако и ты ныне всю Церковь Русскую подвиги твоими и чудесы духовно облистал еси и по достоянию первоначальник иноков русских именуешися. Темже зовем ти:

Радуйся, во смирении твоем великих дарований Божиих удостоенный; радуйся, нищетою духовною богатство небесное стяжавый.

Радуйся, древним пророком Божиим равночестный; радуйся, прозорливости благодатныя преисполненный.

Радуйся, будущая яко настоящая созерцавый; радуйся, тайная помышления человеческая прозревавый.

Радуйся, вся искушения духов тьмы победоносно отражавый; радуйся, велию власть на диавола от Господа получивый.

Радуйся, от мучительства демонскаго многая человеки молитвою твоею свободивый; радуйся, яко исцеления благодатная от гроба твоего верным подаеши.

Радуйся, победивый враги невидимыя глубоким твоим смирением; радуйся, низложивый и посрамивый гордыню злобнаго велиара.

Радуйся, Антоние, монашескаго на Руси жития первоначальниче.

Кондак 8

Странное и безмолвное житие провождал еси, богоносне отче, егда от Чернигова паки в Киев возвратился еси и от Дальния пещеры твоея в Ближнюю преселился еси, юже со ученики твоими ископав, яко рай красный удобрил еси подвиги твоими и чудесы, и в ней безмолвно пребывая, умиленно воспевал еси Царю Славы Христу: Аллилуиа.

Икос 8

Весь в Бозе быв богомыслием непрестанным, преподобне отче Антоние, в светлом видении в Цареграде, во Влахернстей церкви, вкупе с преподобным Феодосием, таинственно виден был еси каменоздательми великия печерския церкве, егда Пресвятая Владычица Богородица посылаше их в Киев сооружати церковь ту и вручаше им божественную икону Успения Своего. Слышавше таковая превелия чудеса Божия, тебе, чудотворцу преславному, вопием:

Радуйся, изрядный слуго Пресвятыя Богородицы; радуйся, присный прославителю Ея милости и чудес.

Радуйся, обитель славную во имя Ея святое на Руси основавый; радуйся, икону Ея чудотворную, от рук Ея дарованную, радостно приявый.

Радуйся, сим образом Ея божественным обитель твою духовно обогативый; радуйся, с Нею вкупе молитися за ны ко Господу дерзновение получивый.

Радуйся, верный исполнителю заповедей Сына Ея и Бога; радуйся, преславный совершителю многих великих чудес.

Радуйся, пещерный жителю, всю Русь исполнивый славою подвигов твоих; радуйся, от темных мест подземных светивый миру равноангельным житием.

Радуйся, безмолвниче дивный, вне житейских сует поживый; радуйся, затворниче благоумиленный, молчаливая уста имевый.

Радуйся, Антоние, монашескаго на Руси жития первоначальниче.

Кондак 9

Всем сердцем Бога возлюбив, отче Антоние, Богом возлюблен был еси, Иже послушаше благоутробно молитвы твоя и исполняше милостиво вся прошения твоя. В указание тебе места, идеже име создатися великая печерская церковь, просил еси, преподобне, у Господа: да будет по всей земли роса, на месте же том суша; и паки: да будет по всей земли суша, на месте же том роса; и бысть тако по прошению твоему. Темже радостно воспел еси чудес Богу: Аллилуиа.

Икос 9

Витий человеческих похвалы превосходит святоподвижническое житие твое, преподобне отче Антоние: кто бо достойно может восхвалити тя, чудотворца преславнаго, огнь с небес сведшаго молитвою твоею, якоже пророк Илия древле, и огнем тем все хврастие попалившаго на месте, идеже име создатися великая церковь печерская, в знамение велией благодати Божией, яже тамо обитати будет. О сем дивящеся, смиренно глаголем:

Радуйся, одушевленной церковию Бога Живаго бывый; радуйся, в храме Триипостаснаго Господа душу твою освятивый.

Радуйся, огнедохновенныя дары Духа Святаго в сердце твое приемый; радуйся, духоносцем, апостолом Христовым, единонравный.

Радуйся, низводителю предивный огня с небесе; радуйся, удостоверителю чудотворный Божия благоволения к месту великия печерския церкве.

Радуйся, адаманте, блистаяй дарами Божия благодати и не сокрушимый прилоги вражиими; радуйся, столпе непоколебимый святыя православныя веры.

Радуйся, чудотворче преславный и богоприятный; радуйся, молитвенниче крепкий и скороуслышанный.

Радуйся, руце твои преподобнеи со дерзновением многим горе воздевавый; радуйся, прошения твоя со слезами теплыми Господеви приносивый.

Радуйся, Антоние, монашескаго на Руси жития первоначальниче.

Кондак 10

Спасителя душ наших, Господа Иисуса Христа, видети сподобился еси в видении дивнем, преподобне отче Антоние, и обетования благая от уст Его Божественных услышал еси, яко верный Его раб и угодник. Молися убо Ему, преподобне, да и нас, убогих, не отринет от сладкаго лицезрения Своего, но сподобит со святыми выну видети лице Его пресветлое и пети Ему: Аллилуиа.

Икос 10

Царя Небеснаго Христа верный раб и последователь был еси, отче преподобне, сего ради чудотворения даром от Него обогатился еси. Мы же, тя целебника благодатнаго ведуще, усердно ныне к святому гробу твоему приходим, и цельбы безмездныя душам и телесем нашим от него приемлюще, благодарственно глаголем ти:

Радуйся, величием подвигов твоих древним богоносным отцем уподобивыйся; радуйся, глубиною смирения твоего превозшедый сподвижники твоя.

Радуйся, сети вражия яко паучину сокрушивый; радуйся, в царствие горнее яко орел воспаривый.

Радуйся, во след себе многия ученики ко Христу приведый; радуйся, чада твоя духовная от искушений диавольских бодренно хранивый.

Радуйся, ленивыя подвигнувый ко исправлению христоподражательным твоим житием; радуйся, грешныя к покаянию приведый богомудрыми твоими словесы.

Радуйся, наказателю любвеобильный; радуйся, увещателю пресладкий.

Радуйся, отче, отцев красото; радуйся, пастырю добрый тобою собраннаго словеснаго стада.

Радуйся, Антоние, монашескаго на Руси жития первоначальниче.

Кондак 11

Пение всеумиленное Господеви приносил еси, преподобне отче Антоние, и, возлежа на одре смертнем, молился еси усердно об обители твоей и ученицех; таже прощение и благословение твоей братии преподав, с миром почил еси, к лику святых и преподобных отец приложився, с нимиже ныне сладце поеши Христу Богу: Аллилуиа.

Икос 11

Светоподательный светильник являешися по смерти, преподобне отче Антоние, из-под спуда пещернаго поставленный на версех небесных, отонудуже светлостию чудес просвещаеши Церковь Христову. Просвети, угодниче Божий, и наша мрачныя души светом Христовым и молитвами твоими помози нам тьмы греховныя избавится, лучи благодати Божия в сердца наша восприяти и неосужденно пети тебе:

Радуйся, светильниче, благодатию сияяй; радуйся, зерцало пресветлое иноческаго жития.

Радуйся, вторый Моисее, мысленныя скрижали, добродетели твоя, нам от горы Святыя принесый; радуйся, вертоград духовный на горах Печерских насадивый.

Радуйся, яко розги его от юга и до севера прострошася; радуйся, яко листвия его присно зеленеют.

Радуйся, оляденевшую в язычестве землю Русскую духовно оплодотворивый; радуйся, садоделатель добрый в ней бывый.

Радуйся, новосаждения богоугодная в ней возрастивый; радуйся, от пещерных затворов в рай Иисусов цветы многая пресадивый.

Радуйся, Ангеле земный; радуйся, человече небесный.

Радуйся, Антоние, монашескаго на Руси жития первоначальниче.

Кондак 12

Благодать Божия хранит священный гроб твой, Антоние, отче наш, огня исхождением и воды излиянием от него возбранивши хотевшим обрести мощи твоя; ты бо, смирен сый, и по смерти не восхотел еси явити мощей твоих миру, сим поучая нас благодатному смирению, да во умилении смиренномудренно поем Богу: Аллилуиа.

Икос 12

Поюще святоподвижное и равноангельное житие твое, преподобне отче, хвалим, славим и величаем укрепившаго тя Господа, даровавшаго нам в тебе образ святый и достоподражательный. Приими убо, угодниче Христов, от нас, смиренных, с любовию всем сердцем тя почитающих, сия нелестныя похвалы:

Радуйся, Пресвятыя Живоначальныя Троицы благоволением увенчанный; радуйся, Пресвятыя Владычицы Богородицы милостями ущедренный.

Радуйся, ангельских воинств содружества сподобивыйся; радуйся, блаженства святых удостоенный.

Радуйся, сонаследниче преподобных; радуйся, постников благодатное удобрение.

Радуйся, пещерножителей славо и похвало; радуйся, всея православныя русския страны крепкое ограждение.

Радуйся, Святыя Лавры твоея непостыдное упование; радуйся, подвизающимся тамо спасения вечнаго ходатаю.

Радуйся, телеса наша безмездно врачуяй чрез прикосновение к честному твоему гробу; радуйся, души наша возводяй к наследию блаженства райскаго святыми твоими молитвами.

Радуйся, Антоние, монашескаго на Руси жития первоначальниче.

Кондак 13

О великий первоначальниче иноков русских и преславный чудотворче, преподобне отче наш Антоние! Мы, чада твоя духовная и овцы пажити твоея, сия малыя песни хвалебныя усердно тебе приносяще, молим тя: яви нам любовь твою отеческую и умоли Господа Бога избавити нас геенны и удостоити Царствия Небеснаго, да поем Ему со святыми: Аллилуиа.

Этот кондак читается трижды, затем икос 1-й «Ангел во плоти был еси...» и кондак 1-й «Избранный угодниче Христов...».

Канон первый преподобному Антонию Печерскому

глас 4

Песнь 1

Ирмос: Отверзу уста моя, н наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Зельным воздержанием, и труды, отче Антоние, и всенощным стоянием душу твою царя над страстьми телесными поставил еси, со святыми веселящеся, Христа поем, тебе такову победу на страсти даровавшаго.

Приспе днесь всечестный день успения твоего, отче Антоние, богатно веселя чада твоя, всечестне. Темже, поминающе твое древнее житие и ангельскую жизнь, светло празднующе, тебе воспеваем, отче.

От темных мест восхитився, к превьшним светлостем преславно прешел еси, преподобне, и тамо со святыми, яко победитель страстей, отче, венчался еси.

Богородичен: Люте погружаемую душу мою в пучине страстей бурею безмерных обстояний, спасения простерши ми руку, возведи, Владычице, из глубины зол моих.

Песнь 3

Ирмос: Твоя песнословцы, Богородице, Живый и Независтный Источниче, лик себе совокупльшия, духовно утверди, в Божественней Твоей славе венцев славы сподоби.

Проповедует преславно и паче трубы вопиет священная твоя, отче, великая Лавра, яже тобою начало приемшая, дом же Божия Матере, аще и не гласом, вещьми же хвалится, глаголя: утвердихся Тобою, Господи.

Единаго Господа возлюбил еси и, Сего Крест на раме взем, преподобне Антоние, страннолепно пожил еси, в постех, и бдениих, и молитвах образ быв твоим учеником. Темже и от Христа прославился еси.

Плотскаго желания, преподобне, отвергся, гордость возненавидел еси, смирением же и нищетою обогатився, превысокая достигл еси святых жилища.

Богородичен: Помилуй, едина Богомати, помилуй и ущедри душу мою окаянную, потопляемую бесы и страстьми лукавыми, и прежде времене исхода моего сию очистити умилосердися.

Седален

Удивися твой духовный настоятель, в тебе велико воздержание зря, и внимаше мыслию хотящая о тебе напоследок быти, Антоние, виде бо по Бозе твое великое житие и вражиими прилоги никакоже поколебима. Темже и свидетельствует, яко отец и хранитель твоего жития, отцем Святыя Горы вопияше: сей, иже посреде нас видится меньший, но последи в России великий светильник будет.

Песнь 4

Ирмос: Неизследный Божий Совет еже от Девы воплощения Тебе, Вышняго, пророк Аввакум усмотряя, зовяше: слава силе Твоей, Господи.

Место, в немже лежит честное и священное тело твое, преподобне Антоние отче, многа исцеления оттуду приемлют вернии, Христу от души вопиюще: слава силе Твоей, Господи.

Не устраши тебе, преподобне, долгота жестокаго пути, ниже тамо разбойническое нашествие. Темже Святую Гору дошед, с сущими тамо отцы воспевал еси: слава силе Твоей, Господи.

Видев Всеблагий Бог твердое твое и доброе изволение, тамо во святых местех посреде отец, славна тя сотворяет, с нимиже сподоби взывати; слава силе Твоей, Господи.

Богородичен: Корень из чресл Тя царских, всех Царь, яко сущу, вожделев и вышшу Херувим и Серафим соделав, Богородице, вселися в Тя.

Песнь 5

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.

Монашествующих образ, отче, и наказатель был еси, темже и сильным запрещаеши на восхищение не желати, но паче маломощныя миловати. И от сего прославился еси, Антоние, и велик наречен учитель явился еси.

Вышше человека, Антоние, стяжал еси житие, равноангельно пожив на земли, темже равну яже Ангелом почесть сподобился еси получити и поеши с ними Владыку твоего.

Богодарованныя твоя благодати, отче Антоние, всяк слух человеческий удивиша и научиша, яже зде мнящаяся великая, яко мала и худа, презрети вся и последовати стопам твоим, отонудуже моли, преподобне, спастися нам.

Богородичен: Упование еси мое, Пречистая, и спасение, и похвала. Темже прибегаю к покрову Твоему: не гнушайся мене, грехи многими, и болезньми, и скорбьми ныне поглощеннаго, но, предваривши, спаси мя.

Песнь 6

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

Всегдашним к Богу рачением вне плоти и мира, отче Антоние, был еси. Темже и жилище достойно Духа Пресвятаго показался еси, якоже и Сам Христос рече: пришед со Отцем и Духом, тамо вселюся.

Яко пресладкий некий виноград, Святая Гора тебе, отче, израстивши, преславно тобою красуется и, радующися, Христа прославляет, тебе сим даровавшаго.

Нощь, яко день, и день, яко нощь, тебе вменяшеся, Антоние: не дал бо еси, по пророку, сна очима твоима, ни веждома дремания, ниже покоя телеси твоему, дондеже сие чисто с душею Богу представил еси.

Богородичен: Твою подаждь ми помощь и избави мя бед, и скорбей, и прегрешений моих, яже всех рождшая присное Избавление.

Кондак, глас 8

Возложив себе Богу, паче всех возлюбленному от юности, преподобне, Тому от всея души любовию последовал еси, мира же тленная ни во чтоже вменив, в земли пещеру соделал еси и, в ней добре противу невидимаго врага козней подвизался, яко светозарное солнце, во вся концы земли возсиял еси, отонудуже, веселяся, прешел еси к Небесным чертогом. И ныне со Ангелы Владычню престолу предстоя, поминай нас, чтущих память твою, да зовем ти: радуйся, Антоние, отче наш.

Икос

Присносущнаго немерцающаго света Святыя Троицы насладитися желая и сего ради четыредесятолетное время в единой пещере темне тебе затворив, оттуду неисходен, отче, пребыл еси, дондеже тело твое чисто с душею Богу представил еси. Отонудуже и по преставлении, яко жив, от Господа дарования чудес приял еси, исцеляти различныя болезни зле страждущих и бесы от человек приходящих изгонити. Темже молим тя: молися, отче, сохранити без вреда отечество твое, град же и люди, да зовем ти: радуйся, Антоние, отче наш.

Песнь 7

Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

Повелением духовнаго твоего настоятеля, блаженне Антоние, паки ко отечеству твоему посылаемь бываеши. Темже реченная тебе отцем, яко от Бога поведенная, сотворил еси, идеже пришед, отче, многих души Господу привел еси.

Святейшаго места, преподобне Антоние, яко достигл, многих житием твоим удивил еси: выше бо человека восприем житие, имже многих мирская презирати сотворил еси.

Святителя Илариона пещеру яко обрет, трудолюбне в ней пожил еси, преподобне, в молитвах и пощениих, дондеже иную пещеру себе соделал еси, в нейже сподобился еси горняго звания.

Богородичен: Человеческия напасти и советы, Чистая, разори Божественными молитвами Твоими и рабы Твоя избави болезненных прегрешений, яко да Приснодеву Тя ублажаем.

Песнь 8

Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Владыки твоего Христа, преподобне Антоние, смирению поревновал еси и сего ради смиренное и жестокое житие возлюбил еси, земнаго пристрастия огреваяся. Темже почести святых сподобился еси и с ними поеши Господа во веки.

Твое преславное успение празднующим, блаженне, молися избавитися всем от различных напастей, да вси тебе прославляем, Антоние, и превозносим Господа во веки.

О нас милостивно око, Антоние, простирай ко Владыце, чадолюбное показуя, и неотлучно от нас духом пребывай, преподобне, якоже обещался еси, егда был еси с нами, да вси с тобою Христу воспоем: благословите, вся дела Господня, Господа.

Богородичен: На моление мое умилосердися ныне и радость ми в печали место даруй, да пою Тя, Владычице, Сыну Твоему воспевая: Господа пойте, дела, и превозносите Его во веки.

Песнь 9

Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Антония, древле просиявшаго, того житию всячески поревновати потщался еси: он бо в пустыню един вселися, ты же в пещере единаго себе затворил еси и многими леты, отче, неисходен пребыл еси.

Печерскому житию первоначальник и наставник, отче, был еси и тамо подвизался еси, яко безплотен. Темже и Христос дарованием чудес обогати тя, преподобне.

Моею руку воздеяние приими, преподобне, Владычней подобяся благости, презирая прегрешения: ты бо душу уязвил еси Христовою любовию и Его Пречистыя Богоматере, Юже умоли спасти души наша.

Богородичен: Рукою твоею, преподобне Антоние, еже к Богу воздеянием, преславно чудодействовася: молитвами бо твоими огнь с Небесе сводиши, во очищение места храма Пречистыя, Юже вси с тобою величаем.

Светилен

Житейское сладострастие умертвил еси, Антоние, славу же маловременную познав, сея вскоре отступил еси, тесным путем изволив ходити, ведущим к райскому пространству. Темже молися, Антоние, спастися тебе почитающим.

Житие святого Антония Печерского

Святого Антония Печерского почитают в Русской Православной церкви в лике преподобного как «начальника русских монахов» (по известному выражению авторов Киево-Печерского патерика). Вместе с преподобным Феодосием Печерским он основал Киево-Печерскую лавру. За годы монашеского подвига Антоний прославился даром врачевания, способностями чудотворения и предвидения.

Родился святой в городе Любеч под Черниговом в 983 году. В миру назывался Антипом. С детства проявляя интерес к Святому Писанию, юношей отправился в путешествие для изучения жизни монахов. Побывав в Палестине, Греции, остановился на Афоне, в одном из монастырей которого принял постриг с именем Антоний. Некоторые источники 18-19 веков утверждают, что это историческое событие произошло в Есфигменском Вознесенском монастыре, а в 50-х годах 19 века там построили часовню в честь святого. Несколько лет прожив на Святой Горе, преподобный возвратился на Русь с благословения игумена монастыря, открывшего Антонию его предназначение в организации монашества на родной земле.

По возвращении в Киев в 1028 году святой посетил все монастыри, но не нашёл в них порядков, подобных афонским. Тогда он облюбовал пещеру на одном из холмов возле Берестова, которую выкопал для молитвенного уединения любимец князя священнослужитель храма Иларион. Во время междоусобиц после смерти князя Владимира Антоний снова ушёл на Афон, а в период княжения Ярослава Мудрого вернулся на Берестовскую гору, опустевшую после назначения Илариона митрополитом.

Жил Антоний по примеру афонских монахов, как аскет. Свою пещеру постепенно расширил. За его благословением начали приходить миряне, а вскоре стали на путь иночества Никон, Феодосий, пришедший в 20-летнем возрасте, боярский сын Варлаам, княжеский управитель дома Ефрем.

После пострига Ефрема и Варлаама князь Изяслав, сын Ярослава, разгневался на Антония за то, что тот не спросил разрешения правителя на монашество его подданных мирян. Он велел новообращённым вернуться домой, а пещеру угрожал разрушить. Антоний с остальными иноками скрылись из Киева. Преподобного защитила жена князя, напомнив Изяславу горький опыт своего отца – польского короля, когда тот притеснял монахов: монарха постигла быстрая смерть, а способствовавшие погрому иноков вельможи тоже погибли. Князь приказал найти Антония и вернул его в Киев, умоляя не покидать гору и не допустить Божьей кары на княжеский дом. Преподобный вернулся, через время возвратились и монахи.

Когда число отшельников увеличилось до 12, пещеру увеличили, устроили в ней церковь, трапезную, келии, таким образом положив начало первому большому и самому значительному монастырю на Руси. В Дальних пещерах Киево-Печерской лавры эти строения сохранились до наших дней. Игуменом обители Антоний не стал. Он желал служить Богу в полном уединении, как привык на Святой Горе.

Поставив настоятелем Варлаама, Антоний ушёл на соседний холм, где обустроил новую пещеру. Иноки, желающие подвигов аскетизма и затворничества по примеру преподобного, приходили к нему и селились рядом. Так возникли Ближние пещеры. Когда Варлаам ушёл из пещер и стал, по приглашению князя Изяслава, игуменом Дмитриевского монастыря, братия, прислушалась совета Антония и выбрала игуменом Феодосия. К тому времени число иноков значительно возросло, была построена наземная небольшая церковь Успения Богородицы.

Братия решила построить монастырь над пещерами и снова за советом пришла к Антонию. Тот послал Изяславу прошение о разрешении создать на горе обитель, и князь, будучи рад услужить прославившемуся святостью Антонию, подарил земли для нового монастыря. Иноки под руководством Феодосия и при молитвах святого Антония соорудили больших размеров Успенский храм, келии, оградили их и назвали обитель Печерской. Жизнь в ней по инициативе Феодосия, восприемника Антония, устроили по уставу афонского Студийского монастыря. Был утверждён порядок богослужений, трапез, распорядок занятий обитателей. Из Киево-Печерского устав распространился и в другие русские монастыри. Во дни игуменства Феодосия и затворничества Антония в монастырь пришёл 17-летним Нестор, ставший Летописцем и описавший историю создания великого духовного центра на Руси и, в назидание потомкам, подвиги его создателя Антония.

Святой, живя в пещерах, лечил людей, давал им травы, которыми питался сам, молился об исцелении. Он возвратил к жизни многих, избавив их и от физических, и от душевных недугов. Летописи сохранили истории о предвидении им поражения русских дружин в 1066 году в битве с половцами у реки Альты, о судьбе варяга Шимона и его роли в построении каменной церкви Печерского монастыря.

В 1068 году во время междоусобных конфликтов между Изяславом и его братом кто-то оклеветал Антония перед князем, и тот сильно разгневался. Тогда ночью черниговский князь Святослав забрал Антония в свои владения, где святой поселился в пещере Болдинской горы близ Чернигова. Позже здесь была устроена Троице-Ильинская обитель, а пещеры названы именем Антония. Через некоторое время Изяслав попросил изгнанника вернуться в Киев, и преподобный снова возвратился к обрадованной братии.

Святой Антоний Печерский умер в 1073 году и похоронен в Ближних пещерах рядом с келией, где провёл большую часть жизни, и пещерной церковью, носящей его имя. Само место отмечено, по традиции лавры, иконой. Мощи преподобного не обретены, хотя попытки предпринимались. В Киево-Печерской лавре Антоний начал почитаться как святой с 11 века. Русской Православной церковью канонизирован в 1133 году.

Дни памяти святого преподобного Антония Печерского – 23 июля н.с., 15 сентября н. с. вместе с преподобным Феодосием Печерским, 11 октября в Соборе преподобных отцов в Ближних пещерах почивающих, а также в Соборе преподобных отцов Киево-Печерского монастыря – во вторую неделю Великого поста. 7 мая упоминается как память преподобного по месяцесловах 15-17 веков.

Мощи Антония Печерского не обретены.  

Всего храмов, посвященных Антонию Печерскому, на данный момент 8 (с учетом приделов, посвященных ему).

Киев, Украина

Успенская Киево-Печерская Лавра. Надкладезная часовня Антония Печерского

Адрес: Украина, город Киев, улица Лаврская, д. 25

 

Ставрополь, Россия

Церковь Воздвижения Креста Господня с пределом Антония Печерского

Адрес: Ставропольский край, г. Ставрополь, ул. Голенева, 67

http://krest-hram.ru

К преподобному Антонию Печерскому обращаются со всеми житейскими нуждами и невзгодами. При жизни преподобный обладал даром целителя и чудотворений, помогает он верующим и после своей кончины.

Икону можно подарить:

– болящим и их родным для молитв об исцелении;

– жителям Киева для молитв о судьбе родного города преподобному, который жил в их городе;

– мужчинам, носящим имя Антон (в крещении – Антоний)